சுரேஷ் பிரதீப் (சுரேஷ் பன்னீர்செல்வம்) (பிறப்பு: ஜனவரி 14, 1992) தமிழில் எழுதிவரும் எழுத்தாளர். திருவாரூர் மாவட்டம் தக்களூரில், பன்னீர்செல்வம், வசந்தா இணையருக்கு இரண்டாவது மகனாக பிறந்தார். அஞ்சல்துறையில் பணியாற்றுகிறார். சுரேஷ் பிரதீப் ஜனவரி 25, 2021 அன்று பிரியதர்ஷினியை மணந்தார். மகள் அஞ்சனா.

இவரது முதல் படைப்பு ‘அலுங்கலின் நடுக்கம்’ எனும் சிறுகதை பதாகை மின்னிதழில் 2017-ல் வெளியானது. அதே ஆண்டு இவருடைய முதல் நாவலான ‘ஒளிர் நிழலும்’ சிறுகதை தொகுப்பான ‘நாயகிகள் நாயகர்களும்’ வெளியாயின. இந்தத் தளம் தவிர தனது வாட்ஸாப் சேனல் வழியாகவும் குறுங்கதைகள் உள்ளிட்ட படைப்புகளை எழுதிவருகிறார்.

இதுவரை வெளியாகியுள்ள இவரது படைப்புகள்:

  • நாவல்கள்
    • ஒளிர்நிழல் நாவல் (2017)
    • கிளைக்கதை (2023)
  • சிறுகதைத் தொகுப்புகள்
    • நாயகிகள் நாயகர்கள் (2017)
    • எஞ்சும் சொற்கள் (2019)
    • உடனிருப்பவன் (2020)
    • பொன்னுலகம் (2021)
    • பத்துப்பாத்திரங்கள் (2022)
  • கட்டுரைத் தொகுப்புகள்
    • தன்வழிச்சேரல் (2018)
  • தொகைநூல்கள்
    • கவினுறு தூரிகை

“சுரேஷ் பிரதீப்பின் இந்நாவல் அதன் கலைத்தன்மையை அடைவது அதன் கணிசமான பக்கங்களில் முன்பு நாம் அறிந்திராத அகநகர்வை கூறியிருப்பதனால்தான். இத்தகைய நுண்ணிய அகச்சித்தரிப்புக்காகவும் முற்றிலும் புதிய சில திறப்புகள் நடக்கும் தருணங்களுக்காகவும் கலைப் பெறுமதி கொண்ட படைப்பென்று நான் இதைக்கூறுவேன். இதன் அடிப்படையில் தமிழில் மிக முக்கியமான படைப்பாளி ஒருவரின் வருகையை அறிவிக்கிறது என்று சொல்லலாம்.. அடுத்த கால்நூற்றாண்டில் தமிழ் மொழியின் முதன்மையான படைப்பாளிகளில் ஒருவராக விளங்குவார் என்று எண்ணுகிறேன்.” என எழுத்தாளர் ஜெயமோகன் சுரேஷ் பிரதீப்பின் முதல் நாவலான ஒளிர்நிழல் முன் வைத்து மதிப்பிடுகிறார்.

“வெவ்வேறு உத்திகளைக் கொண்டு மாறுபட்ட கதைசொல்லல் முறைகளைக் கையாண்ட போதிலும் சுரேஷ் பிரதீப்பின் பேசுபொருள் சாதிய அழுத்தங்களாலும் சீர்கெட்ட உறவுகளாலும் நவீன வாழ்வில் பெரும் மனச் சிதைவுக்கு உள்ளாகியிருக்கும் இன்றைய இளைஞர்களின், சமூகத்தின் தீர்வுகளற்ற கையறு நிலை என்பதால் இக்கதைகள் அழுத்தம் பெறுகின்றன” என்று விமர்சகர் எம். கோபாலகிருஷ்ணன் மதிப்பிடுகிறார்.

விருதுகள்

  • 2017-ல் வாசகசாலை சிறந்த அறிமுக எழுத்தாளர் விருது பெற்றார்.
  • 2021-ல் ‘பத்து பாத்திரங்கள்’ படைப்புக்காக புதுமைப்பித்தன் குறுநாவல் பரிசு பெற்றார்.

அமைப்புப் பணிகள்

  • சுரேஷ் பிரதீப் திருவாரூரில் ‘நதிக்கரை இலக்கிய வட்டம்’ என்னும் இலக்கியச் சந்திப்பு நிகழ்வை நண்பர்களுடன் நடத்தி வருகிறார்.
  • 2020-ல் எழுத்தாளர் அனோஜன் பாலகிருஷ்ணனுடன் இணைந்து அகழ் மின்னிதழின் பொறுப்பாசிரியர்களுள் ஒருவராக இருந்தார்.
  • Tamil Literary Talks என்ற பெயரில் இலக்கிய விமர்சன உரைகளை காணொளிகளாக வெளியிட்டு வருகிறார்.

இணைப்புகள்

மின்னஞ்சலில் தொடர்பு கொள்ள: sureshpradheep@gmail.com